رئيس مجلس الإدارة
مدحت بركات
رئيس التحرير
محمد توفيق
ads
ads
ads
حبيبة الزين
حبيبة الزين

سيرة الجمّيز «شعــر»

الإثنين 18/مارس/2019 - 11:44 ص
طباعة

الضلمة الأوسع من قلب البير

بكيت يومها من عينها..  وناحت بوابير

كات سمرا وعذبة وقاتلها الحزن

كات روحها في أبوها وفي ريحة الطين

ضحكتها عارفاها الناس ومعاشراها

حضنها واسع فيه مطروح التين

لولا عنيها حابسين الدمع

مستني بس الفرصة عشان يسري

زي النيل المحبوس في السد

لو لحظة فتحوا ليه الباب. حالا يجري

أهو هو الدمع اللي في جوفها

مغموس بالفرقة وبعجز الإنسان

والقسوة الظاهرة بتداري جمالك يا حنان

واخداها وراثة تخبي الحب وتقفل بابه

أفكر جدي يوم مات أخو جدة

قطعت خلاقتها و تاهت في سواده

فضلت تبكي وتصرخ وتنوح

وكأن روحها خلاص هتروح

جدي بهيبته والقسوة الظاهرة عليه

خدها ف حضنه وضمها ليه

من شدة ضمة سمعنا ضلوع بتضم ضلوع

وبحور الشوق  ممزوجة بملحك يا دموع

الحزن ، الشبه المتوارث واخدينه عياقة

والكيف في الشجن المزروع تفاصيل

والنسمة إن عدت هزت قلب النخل ومال

نمشي بروحنا ورا الأيام ونميل

 -بنغمس بيه الشاي / بيغمس بينا الشاي -

زي ما بنسيب الطّفل في جوف الكوباي

بيسيبنا جوا الحزن ونحس بإنه جميل ..

والإيد مرسومة عليها علامة الفاس

والأرض تحن لدوسة رجل صاحبها

تتطرح ورد محل ما داس ..

من بعد رحيل العمر ونهاية الرحلة

 تموت من بعده ومن بعد غيابه

يهجرها ملاك الروح ويدب ملاك اليأس

اه ملكين زي الموت والحياة - لاتنين-

ماهو بردوا الموت صاحبة ملاك مش إبليس

والليل لو فكر بس يطل الليل

اكنس قدام عتبات بيتنا

وأحط حصير ..

مرشوش بمحبتي للدنيا

وتعب المشاوير..

بستني الناس ..  زي الزرع ما يستني الشمس

استني حكاوي الجيرة ..  زي الغد ما استني الأمس

تعرف ربنا من روحك و أرواح  الناس

وأخبي الخوف والعجز / آه يا جميز عاجز زي وبتحس

لا منهم شبعانين بيك ،

ولا منك راضي عن ضِلك

لما يتخبوا فيك ..

ويعدي الليل ينسج في خيوط الصبح

ويمر الصبح السابح في ضلام الليل

ومازلت بخاف وأحزن وأفرح

اسند راسي ع الجميز وأسرح وأميل

نفس الجميز ..

 اللي مال جدي عليه وعجز ..

روحي تعجز.. 

واقوله كفاية ضِلك بيحابي الناس

وأغفل..

وأحلم بالجميز بيطبطب فيا ويقول :

"  قلبك تحويشة لحوجة الناس "

وأفوق مِ الغفلة حاسا بالخوف اتسحب

وهواجس شكي دخلت جوه السرداب

وأجس بإيدي الشجرة واتمني اخدها ف حضني

زي الأرض ما تاخد الحّب

وأحب..

افضل طول العمر بحب

والجميز .. تفضل حواليه الناس بتدب

ads
ads
ads
القاهرة الطقس
ads
ads
ads
بتوقيت القاهرة
الفجر
0.:38
الظهر
0.:38
العصر
0.:38
المغرب
0.:38
العشاء
0.:38