رئيس مجلس الإدارة
مدحت بركات
رئيس التحرير
محمد الشواف

قواعد التعليم الـ 10

الأربعاء 03/أكتوبر/2018 - 12:00 ص
الطريق
طباعة
قواعد التعليم الـ

كتب: أبو العُريف


بدأ العام الدراسي وبدأت معه أزمات كل عام عن التكدس في الفصول، وعن اختلاف المناهج وعدم توافر الكتب، ومشاكل المدرسين وأولياء الأمور مما يجعل لزامًا علينا ان نقدم لك عزيزي القارئ  قواعد  التعليم الـ 10


القاعدة الأولى
العلم في "الراس" مش في "الكراس"

إياك التفكير في أن ذهاب ابنك إلى المدرسة كل صباح، وهو يحمل على كتفيه  حقيبة بحجم "باراشوت" Parachutes إنه هياخد نوبل...
آخره دبلوم وهتشتري له "توكتوك" قسط وتشغله عليه.

 

القاعدة الثانية

إجري ياابن آدم جري الوحوش غير "ديسكك" لن تحُوش

مش معنى إن الدراسة ابتديت تاخد ابنك الساعة 3 الفجر عشان تنط بيه سور المدرسة وتتشعلق على المواسير عشان تقعده في "الديسك" الأول في الفصل، مش رايحين نصلي الفجر إحنا.

 

القاعدة التالته

جت "العيال" تفرح مالقتلهاش "مطرح"

في بلدنا التعليم كالماء والهواء كتير قوي وماحدش واخد باله، وعشان كده تلاقي الفصل فيه حوالي 105 راس، وكأنها مزرعة لتثمين الأطفال، عشان يبقوا "شحُطه" – جمع شحط لامؤاخذة- أد الدنيا في المستقبل.

 

القاعدة الرابعة

"العدوى" علينا حق

مش معنى إنك مودي ابنك  مدرسة عشان يتعلم، إنه يتعلم حاجات كويسة، بالعكس حضرتك.. ابن حضرتك أصلا هيروح المدرسة عامل زي السفنجة هيشرب من كل اللي حواليه، وهيشرب سجاير بدري، وهيشتم، وهيعمل كل حاجة انت نفسك ما يعملهاش، ماهي مدرسة بقى.

 

القاعدة الخامسة

"اللانش باج" رجس من عمل "الإنسان"

مش معنى إن الحياة اتطورت، وإن الإنسان لازم يواكب التطور، إننا نخرج من ورقة الجرنال اللي كنا بنلف فيها "ساندويتشات" الولاد، ونروح للكيس البلاستيك، لأ.. ومش بس كده ده الموضوع خلاص وصل لمرحلة صعبة قوي وبقى في حاجة اسمها "لانش بوكس" – صندوق بلاستيك الأمهات بقيت ترص فيه بواقي الغدا للعيال- ومازاد الطين بلة هو اختراع حقيبة خاصة اسمها لامؤاخذة " لانش باج" كل وظيفتها إن يتحط فيها أم اللانش بوكس.. وتمنه حاليًا في الأماكن الشعبية بيبدأ من 50 جنيه.. طب ليه!!

 

القاعدة السادسة

إدي ابنك درس خصوصي.. مش مصدقني؟؟ آني آسف

 في ظل الأوضاع المتردية لمنظومة رواتب المعلمين، ومع العدد "الضخم" داخل الفصول، المدرس مش هيوجع قلبه ويشرح للعدد ده كله وكل واحد أصلًا مركز في لامؤاخذذة شنطة اللي جنبه وهي لازقة لامؤاخذة في شنطته-مشيها شنطته-
فعشان تضمن مستوى تعليمي مرتفع لابنك.. ويشتغل إن شاء الله على تاكسي بدل "التوكتوك" اديله درس خصوصي.

 

القاعدة السابعة

علموهم السباحة والرماية وركوب الخيل

 

ماتستغربش من القاعدة دي.. حضرتك لازم تعلم ابنك السباحة، عشان هو فعليًا هيحتاجها وقت "الفسحة" لما ينزل "حوش" المدرسة اللي مساحته 50 × 50 عشان يلعب في وسط 6000 طالب.
والرماية أكيد مهمة عشان يعرف يعرف "يرمي" الطوب في خناقات المدارس اللي أخدت منحنى خطير خلال العقد الزمني اللي فات.

أما وعن ركوب الخيل، فيعد هو الأبرز من بين المهارات اللي لازم ابنك يتعلمها أمال هينط من ع السور إزاي؟؟!

 

القاعدة الثامنة

بلاش تظبط المنبه

كأي أب مصري انت بتحاول رغم كل حاجة تكون مثالي، وتصحى بدري عشان تحضر لابنك لامؤاخذة الـ"لانش بوكس" وتصحي ابنك يروح المدرسة، بس مش معنى كده انك تظبط المنبه على الساعة 5 وتصحي جارك وانت أصلا بتعمل "snooze"  وتقوم الساعة 6:30 ارحم أمي العيانة ونام بدري.

 

القاعدة التاسعة

أجل عمل اليوم لأي يوم تاني .. الدنيا مش هتطير

الواجب على فكرة معمول عشان مايتعملش أصلًا فما تتعبش نفسك وتتعب ابنك وتقعدوا عشان تعملوا الواجب.

 

القاعدة العاشرة

اللي اتعلموا خدوا ايه

صدقني مش هتفرق ابنك اتعلم في مدرسة ولا لأ.. بص على نفسك وانت تعرف ابنك هيبقى ايه.. ما ابن الدكتور هيكون دكتوروابن المحامي أكيد هيطلع محامي.. وماتنساش لازم تدي ابنك درس

هل توافق على إغلاق المقاهي عند منتصف الليل؟

هل توافق على إغلاق المقاهي عند منتصف الليل؟
القاهرة الطقس
دولار امريكي
18.05
ج.م
دولار امريكي
18.05
ج.م
دولار امريكي
18.05
ج.م
دولار امريكي
18.05
ج.م
دولار امريكي
18.05
ج.م
دولار امريكي
18.05
ج.م
بتوقيت القاهرة
الفجر
0.:38
الظهر
0.:38
العصر
0.:38
المغرب
0.:38
العشاء
0.:38